Wever: Parlamento lo haya presupuesto 2019 cu tempo amplio pa trata

ORANJESTAD – Presupuesto 2019 ta na caminda pa Parlamento. Mas cu esey, prome minister Evelyn Wever no por a bisa NoticiaCla dialuna mainta. Pues no tabatin un termino exacto riba cual Parlamento lo a ricibi e presupuesto en cuestion. E mandatario a sigura cu Parlamento lo haye ‘ruim op tijd’, pues cu no mester preocupa cu e ta yega laat te cu por tin problema pa keda cla prome cu recess. E mandatario a sigura cu e asunto di deadline di 15 di December no ta un ‘issue’, cu mester preocupa cu si no cumpli, Aruba por haya un instruccion. Esaki pasobra Wever ta bisa cu ‘tin bista’ riba e presupuesto. Y tanten cu ‘tin bista’ riba dje, e fecha di 15 di December no mester ta un problema. 

ACLARIACION 

E aclariacion di e mandatario ta cu e fecha di 15 di December ta loke ta para den ley di LAFT cu gobierno anterior a bin cune caminda cu ta para cu si pa 15 di December e presupuesto di e aña siguiente no wordo aproba pa parlamento of no tin un bista ki dia e ta wordo aproba pa Parlamento, e colegio di supervision financiero ta manda un conseho pa Rijks Minister Raad cu lo por yega na bira un KB. Na e momento aki sinembargo segun Wever, tin un bista riba e prespuesto. “Pues e deadline di 15 (di December) no ta asina relevante. Pa nos ta mas relevante pa Parlamento trate prome cu su recess y pa Parlamento tin tur tempo amplio pa trate y esey ta e palabracionan cu tin” Wever a sigui bisa riba e tema.