165 ton di sushi recogi den prome siman di Zona di Desperdicio

ORANJESTAD – E nobo Zona di Desperdicio na Barcadera a registra un inicio fuerte, cu casi 1.000 ciudadano aprobechando di e facilidad durante su prome siman di operacion.

Entre 1 y 7 di juni, un total di 945 vehiculo a entrega mas cu 165 ton (165.680 kilogram) di desperdicio, suficiente pa yena 130 baki. E resultado ta confirma cu tin un gran necesidad den comunidad pa facilidadnan permanente unda residente por deshaci di sushi di un manera responsable.

Segun Gobierno, e exito di e proyecto Aruba Limpi ta mustra cu hopi famia ta busca opcionnan accesibel pa mantene nan lugar limpi sin costo adicional. Diasabra tabata e dia cu mas actividad, cu 191 vehiculo y mas cu 33 ton di desperdicio procesa.

E iniciativa ta sigui e exito di programa Baki den Bario, cu a recoge mas cu 800 ton di sushi durante 2025. Den solamente un siman, Zona di Desperdicio a atrae casi un cuarto di e total di vehiculonan cu a participa den henter e campaña di aña pasa.