Dept Enseñansa monitoriando situacion di tempo

ORANJESTAD - Ministerio y Departamento di Enseñansa Aruba ta den contacto cu autoridadnan local cu ta monitoria e situacion di tempo hopi di cerca pa asina determina si algun paso specifico mester wordo tuma.

SISTEMA TROPICAL

Ta trata aki particularmente di un sistema tropical #TropicalStormMatthew cu ta moviendo den nos direccion. Ya pa algun dia ta siguiendo di cerca e sistema tropical aki y su posibel consecuencianan pa Aruba. Informacion ricibi te na momento aki (diamars 27 di september, 12or merdia) ta indica cu e sistema tropical lo aumenta den forsa y su centro di circulacion lo por pasa mas o menos 150-200 km noord di Aruba diabierna dia 30 di september proximo.

CERA SCOL OF NO?

Mirando cu fecha aki (30 di september 2016) ta e prome dia di "oktober vakantie", e no ta necesario pa considera un posibel ceramento di scol. Den caso cu tin algun cambio den e situacion lo informa e scolnan di esaki mas pronto cu ta posibel.

MANUAL

Ministerio y Departamento di Enseñansa ta sugeri scolnan pa repasa e manual "Traha na un Scol Safe" (Veilige School map) cu ta consisti di medidanan y procedura pa prevencion y/of posibel accion den caso di crisis y incidente. Den  [Deel 2 | Handelingswijzers, pagina 41] ta duna algun instruccion y sugerencia pa den caso di mal tempo of un horcan. Ta avisa pueblo pa keda pendiente pa boletinan oficial di tempo via e canalnan oficial di Gobierno. Gobierno y Servicio Meteorologico di Aruba (METEO) ta den contacto cu diferente otro servicio meteorologico di e region, National Hurricane Center na Miami y KNMI di Hulanda. E boletinan di prensa relaciona cu e sistema tropical ta wordo haci den coordinacion cu Minister di Transporte (Oduber) y Minister di Asuntonan General (Eman). foto cortesia METEO.