Hues a prohibi Preserva Malmok cobra gobierno multa

ORANJESTAD - Hues awe den un sentencia inmediato, a prohibi e grupo di habitante bou di e nomber Preserva Malmok y 8 otro ciudadano mas, pa ehecuta un multa contra gobierno di Aruba segun veredicto anterior di 13 di januari 2016. Gobierno pa haya claridad y evita e cobransa, a entama e caso cu a tuma lugar awe mainta. Cu e veredicto aki, e ta kita e ultimo obstaculo pa minister di salud otorga e ultimo permiso necesario pa Ocean Z hotel por habri su portanan. Y si Preserva Malmok no cumpli cu e sentencia di awe, e ta haya un multa cu por yega un maximo di 1 miyon florin. E caso mes a tuma lugar awe mainta tempran, unda cu pues hues a dicta sentencia mesora. 

MERITO DI CASO 

Riba su mes e caso tabata interesante mirando cu hues na inicio a puntra partidonan pakico nan ta kere cu mester paga un multa. Riba esaki e mes a mustra cu e motibo ta pasobra den prensa a crea e impresion como cu si fuera Preserva Malmok tabata cla pa cobra e multa pasobra a sinti cu a viola e sentencia, y cu gobierno no kier a risca e hecho cu esaki lo a sosode. Den esaki abogado di Preserva Malmok a mustra hues cu si algo asina sali den prensa of no, no ta importante. Te hasta den e sentencia, a cita NoticiaCla.com como fuente di noticia cu a publica un reaccion di minister riba e situacion cu a surgi of cu por surgi si e duna un permiso di hotel of no.

MOTIVACION DI SENTENCIA

Den e sentencia, corte ta mustra cu den e sentencia di 13 di januari a impone un prohibicion contra gobierno pa cambia destino di e tereno erfpacht, pero aki ta mustra mesora cu no por papia di violacion di e prohibicion. Esaki pasobra gobierno no a cambia e destinacion riba of despues di e sentencia, sino prome caba. Pues e prohibicion y multa consecuentemente no ta valido. 

ARGUMENTO

Den caso di Preserva Malmok, corte ta mustra cu nan ta insisti cu e multa ta aplicabel ainda contra gobierno y cu mester cobra esaki. Di banda di gobierno ta mustra consecuentemente cu tin urgencia pa bringa esaki y pa para cualkier posibel ehecucion. Pero ta sinti cu e unico forma cu por haci esaki, ta pa medio di un sentencia di hues pa asina kita e menasa di cobransa. Den cuadro di esaki hues a mustra cu e ta ehecucion di e multa ta wordo adapta y ta modera esaki. Den esaki ta musta cu ta solamente esnan cu viola e prohibicion di ehecucion lo mester paga multa. Y mes moment hues a bisa cu e partido cu ta perde esaki ta Preserva Malmok y resto di e acusadonan den e caso aki, y cu nan mester paga e gastonan di e caso. 

SENTENCIA

Mes momento a dicta prohibicion di e ehecucion di e sentencia di dia 13 di januari 2016, cu ta nifica cu Preserva Malmok no por cobra gobierno ningun multa mirando e ariba menciona unda cu ta splica cu gobierno ningun momento a viola e sentencia anterior.