Corte a dicta contra doñonan di boutique hotel y gobierno

ORANJESTAD - Tanto gobierno como doño di e boutique hotel Ocean Z, esta Zissu Properties, a perde caso contra e grupo Preserva Malmok y 9 habitante di Malmok awe merdia. Ambos partido cu a perde e caso, a haya orden pa tene nan mes na dje, y si no cumpli, haya nan mes cu un multa di minimo 25 mil florin pa dia te maximo di 10 miyon florin total. Gobierno di su banda a wordo prohibi pa haci un cambio di e permiso cu Zissu Properties tin (pa tin un hotel enbes di un residencia ), cual toch nan a haci dia 5 di januari ultimo. Cu esey nan a viola un 'tussenvonnis' dicta comienso di december di aña pasa. Den caso di Zissu Properties, mescos cu e tussenvonnis na december ultimo, nan mester para tur operacion pendiente, te ora cu tin un sentencia di e bodemprocedure, sino ta haya nan sirbi cu un multa di 25 mil florin minimal pa dia, te un maximo di 10 miyon florin.( Lesa e sentencia aki.) 

CASO ANTERIOR

Tabata na december aña pasa, cu huez a dicta un medida temporal, stipulando cu operadornan di e boutique hotel Ocean Z, -esta Zizzu properties-, mester a para nan operacion mesora y si no cumpli cu esaki lo mester paga un multa di 25 mil florin te na maximo di 10 miyon florin. Motibo di esaki ta, cu tanto e construccion pa e hotel y restaurant, ta ilegal. Esey huez a dicta awe mainta den un caso sumario. Abogado, mr. Lincoln “Dello” Gomez, a confirma na NoticiaCla.com, cu e paro di operacion mesora, ta por lo menos te dia 13 di januari 2016, ora cu corte dicta un proximo sentencia. (Por lesa e veredicto temporal aki)

KEHO DI HABITANTENAN

Tabata un grupo di habitante di Malmok, cu a entama e caso, mirando cu e operacion di hotel tabata causa disturbio y no tabata na agrado di e calidad di bida di e habitantenan den besindario. Huez a cuestiona durante e caso, con por ta, cu doñonan di Ocean Z por tabatin consehonan interno pa minister den nan poder. Algo cu no mester ta e caso. 

REACCION DI ZIZZU PROPERTIES

Despues di varios intento, a logra haya contacto cu e propietario di e compania Eva Zissu, cu a bay di acuerdo pa duna su reaccion riba e caso. El a sigura NoticiaCla.com cu tur su cosnan tabata bon regla y cu mayoria di loke ta wordo bisa, no ta cuadra. A haci varios cita pa por bishita e propiedad, pero pa motibo di inconveniencia di banda di Zissu, esaki ainda no a tuma lugar. Ta keda pendiente pues pa e por a presenta su banda di medaya, cu e tabata dispuesto pa duna pero no a logra ainda.