Alerta di temblor fuerte na Venezuela ta causa preocupacion entre residente y usuario di Android

CARACAS – Miles di personanan na Venezuela (y Aruba) a ricibi diaranson atardi un alerta di emergencia riba nan telefon Android tocante un supuesto temblor fuerte cu un magnitud estima di 7.0.

Segun e mensahe manda pa Android Earthquake Alerts System, e movimento sismico tabata localisa den region central-nort di Venezuela, cerca di e estado Yaracuy. E alerta a advirti ciudadano pa keda alerta, indicando cu replica of "aftershocks" ta comun despues di un temblor fuerte.

E notificacion a wordo ricibi pa usuario cu tabata te mas cu 169 milla di distancia di e epicentro estima. Riba rednan social, hopi residente di diferente ciudadnan venezolano a comparti captura di pantaya di e alerta y a relata cu nan a sinti e movimiento. Aki na Aruba tambe. 

Te momento di publicacion, autoridadnan sismologico ainda tabata recopilando y verificando dato pa determina e magnitud exacto, profundidad y localisacion oficial di e evento.

Specialistanan ta recorda cu e sistema di alerta di Android ta usa sensor den telefononan movil pa detecta actividad sismico rapidamente y emiti advertencianan inicial. Sin embargo, e informacion inicial por wordo revisa despues cu institucionnan sismologico nacional y internacional completa nan analisis.

No tabatin reportenan inmediato di daño mayor ni victiman, pero autoridadnan a pidi poblacion pa sigui informacion oficial y mantene cautela den caso cu replica adicional tuma lugar.

Venezuela ta situa riba diferente faya tectonico activo y regularmente experimenta temblornan di diferente intensidad. E region di Yaracuy y e area central di e pais a registra actividad sismico den pasado.

Autoridadnan di emergencia ta sigui monitoriando e situacion y lo publica actualisacionnan conforme mas informacion oficial bira disponibel.

NA ARUBA 

Na Aruba varios hende tambe a sinti e temblor y ricibi un mensahe di alerta. Pero localmente autoridad no a avisa nada ainda oficialmente.