Gobierno a entama caso contra Preserva Malmok pa para multa

ORANJESTAD - Gobierno ta hiba e grupo Preserva Malmok corte. Gobierno a duna su abogadonan luz berde pa entama un caso pa frustra e intento di Preserva Malmok pa cobra e multa diario di 25 mil florin (te na un maximo di 10 miyon florin). E bufete di abogado Sjiem Fat a confirma esaki pa NoticiaCla.com diamars atardi. E intencion ta pa inicia un asina yama 'executiegeschil'. " Di e manera aki, gobierno por sigui cana e caminda pa loke ta e hotelvergunning riba cual ainda mester tuma un desicion".  

SENTENCIA 

Manera ta conoci siman pasa Corte di apelacion a dicta na fabor di Zissu Properties NV, doño di Ocean Z boutique hotel. A mustra cu no tin ningun obhecion manera cu Preserva Malmok a pretende y como tal ta revoca e sentencia (medida) di 13 di januari 2016 contra Zissu. Abogado pa Preserva Malmok esta Dello Gomez ,-mientras ta admiti cu su cliente a logra hopi si-, ta nenga di acepta cu esaki ta nifica cu no por cobra e multa contra gobierno, pasobra 'no ta gobierno a apela sino Zissu'. Tanto abogado di Zissu como di gobierno ta pensa diferente. De hecho, abogado di gobierno a confirma na NoticiaCla.com Preserva Malmok a menasa gobierno di 'efectua e cobransa' di e multa. Gobierno na su turno a duna Preserva Malmok un ultimatum pa stop e menaza/cobransa sino ta hiba nan corte. Preserva Malmok no a cumpli, y awor riba sugerencia legal, gobierno a entama e caso contra Preserva Malmok. E caso ta programa pa tuma lugar 12 di mei proximo pa 8:30 am. 

CASO

E caso ta parti di un serie di caso cu a cuminsa fin di aña pasa, ora cu Preserva Malmok a inicia un caso pa para e proceso pa e hotel por haya su permiso pa por cuminsa cu operacion di e hotel, argumentando un cantidad di punto. Hues den prome instancia a duna Preserva Malmok gana, pero siman pasa e sentencia ey a keda destrui.