Schwengle lo firma pa Ocean Z habri ora kita menasa di multa

ORANJESTAD - Minister di salud Alex Schwengle lo firma e permiso di hotel pa e compania Zissu Properties NV si gobierno gana e caso cu el a entama contra Preserva Malmok. MInister Schwengle a confirma esaki na NoticiaCla.com dialuna merdia. "Manera cu e ley ta, si tur cos ta in place, mi ta suppose di firma" Schwengle a bisa e portal aki. E caso cu mester wordo gana, ta pa kita e menasa di multa basa riba un sentencia anterior (fecha 13 di januari 2016:red). "Si e obstaculo ey no tey mas, anto e ora mi ta liber pa firma" e mandatario a sigui bisa. Y pa kita e obstaculo final ey, tin e caso sumario den corte diahuebs awo. 

PERMISO CONDICIONA

Mes momento, Schwengle ta mustra si cu mientras cu e lo firma e permiso pa Ocean Z por habri, e ta un permiso condiciona. "E no ta bay ta un hotel manera e (otro) hotelnan. E ta bay ta un vergunning cu su beperkingen (limitacion:red). Eigenlijk e ta bay ta un 'bed and breakfast' pero formalisa" Schwengle a clarifica. 

E CASO 

Manera cu NoticiaCla.com a raporta den forma di primicia recientemente, gobierno a confirma cu e ta hiba e grupo Preserva Malmok corte diahuebs awor pa 8:30am. Gobierno a duna su abogadonan luz berde pa entama un caso pa frustra e intento di Preserva Malmok pa cobra e multa diario di 25 mil florin (te na un maximo di 10 miyon florin). E bufete di abogado Sjiem Fat a confirma esaki pa NoticiaCla.com diamars atardi. E intencion ta pa inicia un asina yama 'executiegeschil'. " Di e manera aki, gobierno por sigui cana e caminda pa loke ta e hotelvergunning riba cual ainda mester tuma un desicion".  

SENTENCIA 

Manera ta conoci algun siman pasa Corte di apelacion a dicta na fabor di Zissu Properties NV, doño di Ocean Z boutique hotel unda cu a mustra cu no tin ningun obhecion pa Ocean Z opera manera cu Preserva Malmok a pretende den su prome caso y como tal ta revoca e sentencia (medida) di 13 di januari 2016 contra Zissu. Abogado pa Preserva Malmok esta Dello Gomez , -mientras ta admiti cu su cliente a logra hopi si- , ta nenga di acepta cu esaki ta nifica cu no por cobra e multa contra gobierno, pasobra 'no ta gobierno a apela sino Zissu'. Tanto abogado di Zissu como di gobierno ta pensa diferente. De hecho, abogado di gobierno a confirma na NoticiaCla.com Preserva Malmok a menasa gobierno di 'efectua e cobransa' di e multa. Gobierno na su turno a duna Preserva Malmok un ultimatum pa stop e menaza/cobransa sino ta hiba nan corte. Preserva Malmok no a cumpli, y awor riba sugerencia legal, gobierno a entama e caso contra Preserva Malmok.  

CASO

E caso ta parti di un serie di caso cu a cuminsa fin di aña pasa, ora cu Preserva Malmok a inicia un caso pa para e proceso pa e hotel por haya su permiso pa por cuminsa cu operacion di e hotel, argumentando un cantidad di punto. Hues den prome instancia a duna Preserva Malmok gana, pero siman pasa e sentencia ey a keda destrui.