Kier introduci parkeermeter den sector hotelero Palm Beach 1 maart

ORANJESTAD – Tur cos ta mustra cu pa 1 di maart proximo, e area di hotel lo conoce un total di 383 vak di parkeer pa cual clientenan mester paga. Segun vocero di Aruparking Sanin Daou, tin cu determina exactamente cuanto espacio lo mester wordo marca geel tambe. Actualmente ta deliberando y marcando e areanan geel, ya cu e otronan regular ta cla caba, segun Daou. Asina cu tur cos ta cla, lo bin afo cu e informacion di cuanto espacio exacto lo ta disponibel pa e area hotelero.

ESPACIO HEEL MARCA PA TRAHADO?

Mescos cu na Playa, tin e aspecto di trahado vs cliente, pero aki e situacion ta diferente segun Daou. El a splica cu den e caso di hotel, nan mes (e hotel) ta provee e trahadonan cu espacio pa parkeer, aunke cu NoticiaCla.com no por a confirma si esaki ta e caso pa tur trahado di tur e hotelnan riba e strip. Ta conoci cu varios hotel aworaki tin nan parkeerplaats controla pa medio di un hefboom, y ta cobra esnan cu no ta huesped, un suma. Huespednan ta haya un token, pero no ta conoci con trahadonan ta anda cu esaki. Segun Daou pues, hotelnan mes lo ‘take care’ di nan hendenan, cu ta pone cu no mester tin e dolor di cabez ey manera na Playa, unda cu mester a asigna lugarnan special, unda cu hendenan por cumpra nan espacio di parkeer mensualmente. No obstante esey, Daou a confirma cu lo tin espacionan geel, pero cu aworaki ainda esey no ta cla y pinta, pues no por bisa cuanto espacio esaki lo ta.