Pieters (PPA): Preveni maltrato di mucha ta mas importante cu solamente aumenta castigo

ORANJESTAD — Parlamentario Eduard Pieters (PPA) ta pidi Gobierno pa concentra mas riba prevencion, deteccion trempan y proteccion di mucha, en bes di limita e debate solamente na castigonan mas severo pa maltrato y abuso sexual.

Segun Pieters, Aruba ya conoce varios debilidad den su sistema di proteccion, pero hopi recomendacion ainda no a wordo implementa. E ta exigi cu Gobierno indica kico a wordo ehecuta, kico falta, ken ta responsabel y pa ki fecha e medidanan lo ta cla.

Pieters ta enfatisa cu un castigo mas halto no tin efecto si investigacion y evidencia no ta suficiente pa logra condenacion. P'esey e ta pidi mas profesional specialisa, mihor investigacion forensico y cooperacion entre polis, Ministerio Publico y instancianan di proteccion.

PPA ta propone un Plan Nacional di Prevencion y Proteccion di Mucha, cu cinco prioridad: audita recomendacionnan existente, fortalece siguimento di muchanan na riesgo, mehora investigacion, capacitacion obligatorio pa profesionalnan y mas educacion preventivo na scol, cas y comunidad.

Pieters kier tambe rapportnan anual pa Parlamento por controla e progreso.

Segun e parlamentario, e berdadero exito no ta solamente castiga culpabelnan, sino logra cu menos mucha bira victima.