TUI ta aumenta vuelo pa Aruba na 2027; gobierno ta inverti 35% mas den mercado Europeo

DEN HAAG — TUI lo aumenta su frecuencia di dos pa tres vuelo pa siman pa Aruba cuminsando april 2027. E anuncio a sigui un reunion entre Minister di Turismo Wendrick Cicilia, director di ATA Ronella Croes y directiva di TUI na Den Haag.

Como parti di e strategia pa diversifica turismo, Aruba a aumenta su presupuesto pa promocion y inversion den mercado Europeo cu 35%. ATA ta proyecta un crecemento di 16% den e mercado aki.

Segun Cicilia, e turista Europeo ta keda mas largo y ta gasta mas, loke ta ofrece oportunidad pa turismo cultural y acomodacion na Oranjestad y San Nicolas.

TUI ta considera un expansion futuro te cinco vuelo pa siman, mientras cu Aruba ta explora conexionnan adicional cu Suisa y Spaña. E plannan aki ainda no ta confirma.

TUI tambe kier amplia su oferta di apartamento y condominio pa atrae bishitantenan cu diferente presupuesto.