Aruba Birdlife Conservation ta exigi claridad di Gobierno tocante rutanan di ATV y UTV

ORANJESTAD — Aruba Birdlife Conservation (ABC), pa medio di su abogado mr. G.W. Rep, a manda un carta fecha 22 di october 2026 na tres minister di Gobierno di Aruba, exigiendo contestanan concreto tocante futuro di ATV y UTV den areanan natural protehi. ABC ta cuestiona si Gobierno ta dispuesto pa sigui e consehonan di su propio departamentonan, cu anteriormente a identifica diferente zonanan caminda vehiculonan motorisa no mester drenta.

CARTA NA TRES MINISTER 

E carta ta dirigi na minister M.G. Eman, minister di Infrastructura René Herdé y minister di Husticia Arthur Dowers, despues di e decision di Corte di 14 di october 2026, cu a indica cu Gobierno, ABC y un representante di tour operators mester drenta den dialogo constructivo.

NO TIN COMUNICACION

Segun abogado Rep, despues di e instruccion di Corte, ainda e no a haya comunicacion tocante un reunion. P'esey ABC ta pidi Gobierno pa presenta su posicion por escrito prome cu e partidonan sinta na mesa.

ABC TA SEÑALA CONSEHO DI DOW, DIP Y DNM

Un di e puntonan principal den e carta ta e conseho conhunto di DOW, DIP y DNM, fecha 24 di september 2026. Segun ABC, e tres departamentonan a recomenda pa uza e investigacionnan y rutanan anteriormente identifica como punto di salida pa un solucion duradero y legalmente sostenibel. E informe di 13 di october 2022 a identifica tres zona como no-go pa ATV y UTV:

- Faro te Alto Vista.

- Natural Bridge te Indjek/Blackstone Beach.

- Caminda di santo entre Sero Colorado y Rode Anker.

ABC ta pidi e ministernan pa splica, cu argumentonan legal y tecnico, si Gobierno kier desvia di e recomendacionnan aki.

ABC NO TA EXIGI CU TUR RUTA CERA

E carta ta mustra cu ABC ta haci distincion entre diferente areanan. Pa Tera Cora y Saliña Druif, cu ta bou di diferente forma di proteccion ambiental, ABC ta cuestiona posibilidad di permiti trafico motorisa. E fundacion ta haci referencia na tratado RAMSAR, legislacion di proteccion di naturalesa y e ROPV. Pa e ruta entre Alto Vista y Bushiribana, ABC ta propone permiti ATV y UTV temporalmente, bou di condicionnan estricto, incluyendo limitacion di velocidad, cantidad di vehiculo, control di zonanan prohibi, midiendo di ruido y stof, y un reduccion gradual. Pa e trayecto entre Bushiribana y Natural Bridge, ABC ta dispuesto pa permiti cu ATV y UTV sigui circula. Sinembargo, pa e area despues di Natural Bridge, incluyendo Andicuri te Parke Arikok, ABC ta mantene su posicion cu e zona mester keda cera pa ATV y UTV.

ABC TA CUESTIONA COSTO DI CAMINDA NOBO

Den e carta, abogado Rep tambe ta critica un proposicion pa construi un caminda cu material DirtGlue. Segun ABC, e calculacion di costo presenta ta incompleto. E fundacion ta exigi un presupuesto completo y un splicacion di pakico Gobierno lo opta pa un inversion di miyones di florin, en bes di sigui e rutanan y recomendacionnan cu ya a wordo prepara anteriormente.

GPS TA UN PASO POSITIVO, PERO ABC KIER MAS

ABC tambe ta reacciona riba e iniciativa recientemente anuncia pa uza tecnologia GPS pa controla ruta y velocidad di ATV y UTV. Segun e fundacion, esaki ta un paso den bon direccion, pero e sistema por resulta principalmente den control despues cu un infraccion ya a sosode. ABC ta propone considera vehiculonan electrico programa cu GPS, cu por limita velocidad y para automaticamente ora un vehiculo sali for di su ruta autorisa. Segun ABC, e alternativa aki tambe lo reduci boroto y mehora experiencia di bishitantenan den naturalesa. E fundacion ta enfatisa cu control efectivo ta exigi personal suficiente, reglanan cla, multa, posibilidad di confiscacion y barreranan fisico adecuado. Como ehempel, ABC ta menciona cu piedranan grandi coloca anteriormente pa Gobierno a wordo kita sin autorizacion, permitiendo vehiculonan bolbe drenta areanan cu tabata cera.

GOBIERNO MESTER PRESENTA SU POSICION

Cu e carta aki, ABC ta solicita un contestacion concreto di Gobierno pa cada un di e areanan menciona, incluyendo e medida di control y aplicacion di ley. E documento no ta representa un acuerdo entre Gobierno y ABC, sino un peticion formal pa claridad, como preparacion pa e dialogo cu Corte a indica. Te momento di e carta, segun abogado Rep, ABC ainda no a ricibi contestacion riba diferente proposicionnan presenta anteriormente.

RESPETA CONSEHO

E pregunta central cu ABC ta pone dilanti Gobierno ta si e lo respeta e consehonan tecnico y legal existente, of si e lo opta pa permiti trafico di ATV y UTV den areanan cu anteriormente a wordo identifica como zonanan cu mester keda protehi.