Investigacion na Aruba ta revela relacion entre sargassum y microplastic

ORANJESTAD — Un investigacion di Josianne Vrolijk, studiante di Bio-Environmental Sciences na Universidad di Aruba, a revela un relacion compleho entre sargassum y microplastic na costa di Aruba.

Vrolijk a investiga muestranan di sargassum y sedimentonan na 11 beach, ocho na parti noord y tres na zuid di Aruba.

E resultadonan ta mustra cu sargassum fresco ta contene otro tipo di microplastic compara cu sargassum cu tin mas tempo na costa. E particulanan den sargassum mas bieu ta mustra mas similaridad cu esnan den santo y sedimentonan rond di dje.

Segun Vrolijk, mas investigacion ta necesario pa compronde con microplastic ta wordo transporta y distribui rond di costa di Aruba.

Vrolijk a gradua exitosamente y ta planea sigui un estudio di master na Universidad di Groningen, Hulanda.