Bandera di Aruba ta bula cu orguyo na Dog Psychology Center di Cesar Millan

SANTA CLARITA — Tres aña despues di su prome participacion den un curso di Cesar Millan, conocido entrenador di cacho Tito Laclé, conoci como The Dog Specialist di Aruba, a ricibi un noticia special emotivo: E bandera di Aruba ta bula na The Dog Psychology Center na Santa Clarita, California, desde participacion di Laclé na 2023.

Durante su bishita di seguimiento na Santa Clarita e siman aki, na California, Laclé a wordo gratamente informa cu, riba orden di Millan, e bandera di Aruba a wordo hisa na e centro como reconocemento pa su participacion. “Bo ta un di e e poconan selecta cu ta forma parti di e grupo elite di entrenadornan cu a pasa den e centro aki”, e representante di e centro a confirma na Laclé e siman aki. Millan mes a ricibi Laclé pa di dos biaha, y tabatin recuerdonan grato, refiriendo na Laclé como ‘The Aruba guy!” Aunke su prome entrenamento a tuma lugar na Fort Lauderdale, Florida, na december 2023, Aruba a ricibi su lugar entre e banderanan internacional na e sede mes.

Pa Laclé, cu a descubri esaki durante su regreso e siman aki, esaki tabata un momento di gran orguyo: su participacion no solamente a contribui na su desaroyo profesional, pero tambe a pone Aruba entre e paisnan representa na e centro.

E la wordo informa cu e ta e unico alumno di e islanan di Caribe Hulandes cu a participa den e programa desde cu e programa a inicia na 2013. For di e tempo ey, tur aña un grupo hopi selecta di entrenador rond di mundo, ta haya oportunidad pa participa. Diadomingo anochi, Laclé a forma parti tambe di e graduacion di e centro, den e curso di avance, pa maneho di cacho.