Kelly (AVP): Regla pa vacation rentals mester proteha vivienda

ORANJESTAD — Parlamentario di AVP, Dennerich Kelly, ta pidi gobierno claridad tocante regulacion di vacation rentals, cu mester reconoce nan contribucion na turismo y proteha acceso na vivienda pagabel pa residentenan.

Kelly ta recorda cu na april 2024 gobierno a anuncia cu e politica tabata den su fase final, incluyendo registracion, permiso, inspeccion y cumplimento cu impuesto. E ta pidi informa cua medidanan a wordo implementa.

Segun e parlamentario, e reglanan mester distingui entre un propietario cu ta huur un camber of un propiedad adicional y un operador comercial cu ta maneha varios vivienda pa turista. E ta propone evalua zonificacion y otro medida pa evita concentracion excesivo den bario residencial.

Kelly ta pidi cifranan actualisa di vacation rentals, huur di largo plazo y prijs di vivienda, cu participacion di e sectornan envolvi y residentenan. “Nos no mester specula. Nos mester midi,” el a conclui.