Islanan ABC ta explora solucion comun pa reduci costo di procesamento di desperdicio

ORANJESTAD — Director interino di SELIBON na Boneiro, Edsel Winklaar, ta positivo tocante posibilidad di cooperacion entre Aruba, Boneiro y Corsou pa maneho y procesamento di desperdicio.

Durante un bishita di Prome Minister Mike Eman na SELIBON, Winklaar a presenta e sistema di coleccion, separacion y exportacion di desperdicio na Boneiro, incluyendo e necesidad di transporta cierto material, manera desperdicio biomedico, pa Hulanda.

E dos a intercambia ideanan tocante un posible solucion regional cu por yuda e tres islanan enfrenta retonan comun y eventualmente reduci dependencia di procesamento na exterior.

Sinembargo, un proyecto asina ta exigi investigacion adicional riba costo, transporte maritimo y infrastructura. Segun Winklaar, Boneiro ta habri pa sigui e dialogo cu Aruba, Corsou y autoridadnan Hulandes.