Ministerio Publico: Victima tabata stuur UTV den accidente mortal

ORANJESTAD — E investigacion di e accidente mortal di UTV di 13 di september ta indica cu e muher hoben cu a perde su bida tabata stuur e vehiculo. Segun Ministerio Publico di Aruba, e resultadonan disponibel te awor, incluyendo grabacion di video, ta mustra esaki.

E aclaracion ta bini despues cu den media y di parti di famia a surgi preguntanan y sugerencianan cu e victima no por tabata e chofer.

E investigacion a cuminsa den man di Cuerpo Policial di Aruba (KPA) y despues a pasa pa Marechaussee (KMar), bao guia di Ministerio Publico. E parti tecnico ta sigui y e investigacion ainda no ta finalisa.

Ministerio Publico a indica cu, debi na e atencion di comunidad, e ta comparti e informacion aki pa duna claridad tocante kende tabata stuur. E lo no duna mas comentario te ora e investigacion ta completamente cla.