Osdelly Lacroes ta representa Aruba na Festival Eurovenezolano di Jazz

ORANJESTAD — Cantante Arubano Osdelly Lacroes a representa Aruba durante e di cuater edicion di Festival Eurovenezolano di Jazz na Venezuela, cu presentacionnan dia 2 y 3 di october na La Guaira y Caracas.

Lacroes tabata acompaña pa pianista Kyle Winklaar, bajista Ivan Quandus y drummer y director musical Carlos Bislip, tur relaciona cu Scol di Musica Rufo Wever.

E repertorio a combina jazz internacional cu composicionnan di Aruba y Corsou, incluyendo “Min’sa”, “Cunucu di Seit” y “E Mariposa”.

Na Teatro Teresa Carreño na Caracas, e musiconan Arubano a participa tambe den un sesion musical hunto cu Simón Bolívar Big Band. E bishita a ofrece oportunidad pa intercambio cultural y profesional.

E delegacion a expresa gratitud na Gobierno di Aruba y otro patrocinadornan pa nan sosten.