Eman na Corsou: Crecemento economico mester beneficia pueblo di Aruba y Caribe

WILLEMSTAD — Prome Minister Mike Eman ta participa na Caribbean United in Excellence Summit, cu ta tuma luga di 7 te 11 di october na Corsou, cu enfasis riba cooperacion regional y prosperidad comparti.

Durante su bishita, Eman a destaca cu, apesar di crecemento economico y bon resultado den turismo, e beneficio no semper ta yega na tur sector di comunidad. El a haci un apelacion na sector empresarial pa contribui na un distribucion mas husto di prosperidad y recompensa adecuado pa trahadornan.

Eman a enfatisa tambe importancia di fortalece relacionnan comercial, cultural y economico entre Aruba y otro paisnan Caribe.

Diabierna 9 di october, e lo participa na un panel di liderazgo hunto cu lidernan di Corsou, Jamaica y Surinam. E conferencia lo inclui tambe firma di un declaracion conhunto dia 10 di october.