DNM ta pidi comunidad yuda proteha parhanan migratorio na Aruba

ORANJESTAD — Den cuadro di Dia Mundial di Parha Migratorio 2026, Directie Natuur en Milieu (DNM) ta haci un yamada na comunidad pa contribui na proteccion di parhanan migratorio bao e tema “Cada parha ta conta – Bo observacionnan ta haci diferencia.”

Aruba ta un punto importante di descanso y alimentacion pa parhanan cu ta biaha miles di kilometer. Sinembargo, secura prolonga, perdida di habitat y contaminacion ta amenaza nan sobrevivencia.

DNM ta recomenda pone awa limpi pa parhanan, sin agrega substancia ni duna nan cuminda. Tambe ta importante mantene distancia di neishinan y evita trafico di vehiculo den areanan natural sensitivo.

Ciudadanonan por registra nan observacionnan via eBird, iNaturalist y ObsIdentify, contribuyendo asina na investigacion y conservacion di biodiversidad na Aruba.