Wever-Croes ta exigi claridad di Hulanda riba “wegvallen” di Betico Croes den anotacion di Beatrix

ORANJESTAD — Lider di MEP, Evelyn Wever-Croes, ta exigi pa Gobierno di Reino (Hulandes) duna claridad tocante anotacionnan personal di ex-reina Beatrix relaciona cu Betico Croes y lucha di Aruba pa Status Aparte. Den un transmision live riba su pagina di Facebook diaransona atardi, Wever-Croes a indica cu MEP a manda preguntanan via Gobierno di Aruba y ta pidi investigacion y publicacion di documentonan relevante.

E CONTROVERSIA

E controversia a surgi despues di publicacion di investigacion historico tocante Casa Real Hulandes. Segun e investigacion, Beatrix tabata critica di Status Aparte y a anota den 1983: “Tijd winnen. Hij zal eens wegvallen. Dat afwachten.” E contexto historico publica te awor no ta permiti conclui cu “wegvallen” tabata referi na morto di Croes; e por referi na desaparicion di dje como factor politico, segun e portal Aruba.nu cu a publica e relato prome. 

FORMULACION TA SUFICIENTE SERIO PA UN CONTESTA OFICIAL

Wever-Croes, sinembargo, ta considera cu e formulacion ta suficientemente serio pa merece un contestacion oficial. “Nos no ta acusando niun hende y nos no ta speculando. Nos ta pidi claridad,” el a bisa. Segun e, e hecho cu Betico tabata relativamente hoben, activo y sumamente popular politicamente na e momento ta haci e palabra “wegvallen” particularmente yamativo.    

CONTROVERSIA DEN BIDA DI BETICO

E lider di MEP a conecta e pregunta tambe cu diferente episodio controversial den bida di Betico Croes, incluyendo incidente di bala, su detencion durante Augustus Scur, e tiroteo cu polis na 1983 y e accidente di auto na 1985 cu finalmente a result’e fatal. Wever-Croes no a presenta evidencia cu e sucesonan aki tabatin conexion cu e anotacion di Beatrix, pero a bisa cu precisamente pa evita speculacion ta necesario pa autoridadnan habri archivonan y aclaria e contexto completo.    

BALA TA DEN CANCHA DI GOBIERNO HULANDES PA ACLARIA

“E bala ta den cancha di Gobierno Hulandes pa aclaria,” Wever-Croes a declara. E ta pidi pa busca si tin mas documento, anotacion of informacion cu por splica kico Beatrix tabata kier men, y pa pone e material relevante disponibel pa pueblo di Aruba y famia di Betico.    

KIER PA MIKE EMAN EXIGI CONTESTA DI DEN HAAG 

Wever-Croes a haci un apelacion tambe na Prome Minister Mike Eman pa, independientemente di diferencia politico historico, exigi un contesta  for di Den Haag. Segun e, e lucha pa Status Aparte ta demasiado importante den historia di Aruba pa laga un pregunta asina grandi sin respuesta. Na mes momento, e lider di MEP a pidi su partidario y comunidad pa evita conclusionnan prematuro. “Nos no ta speculando,” el a repiti, agregando cu prioridad mester keda Aruba y cu e partido lo spera resultado di e peticion pa aclaracion.