Gobierno kier bin cu parkeergarage di 4 piso cu vivienda y oficina den centro di Oranjestad

ORANJESTAD — Gobierno a drenta den e siguiente fase pa un posible parkeergarage moderno na crusada di John G. Emanstraat y Emmastraat, combina cu espacio pa vivienda y/oficina. Conseho di Minister a aproba un acuerdo cu MGM Source – Economic Financial Investment Advisory pa haci un estudio di factibilidad financiero y economico.

E concepto ta contempla un facilidad di parkeer di aproximadamente 4 pa 5 piso, cu 2 pa 3 piso adicional pa vivienda y/oficina. E estudio mester determina costo, sostenibilidad financiero, modelo di exploitacion, opcionnan di financiamento y e posible impacto economico riba centro di Oranjestad.

Segun minister Geoffrey Wever, e proyecto forma parti di e revitalisacion di centro y mester yuda crea mehor accesibilidad pa actividad comercial, horeca, oficina, vivienda y servicio publico.

MGM Source lo analiza demanda actual y futuro pa parkeer, desaroyonan residencial y comercial den e area y diferente configuracion pa e proyecto. Renobacion Aruba N.V. ta considera como posible participante den desaroyo, financiamento y explotacion.

Wever a enfatisa cu e acuerdo no ta un decision final pa construi. E estudio ta solamente e fase di factibilidad y, despues di entrega di informacion necesario, ta proyecta pa wordo completa dentro di aproximadamente 30 dia.