Tromp-Lee (MEP) kier reunion cu Minister di Labor tocante DAO, DPL y salario minimo pa hoben

ORANJESTAD — Parlamentario di MEP, drs. Shailiny Tromp-Lee, a solicita un reunion cu Minister di Labor pa trata varios asunto cu, segun e, ta exigi claridad y seguimiento den mercado laboral di Aruba.

Den un carta dirigi na presidente di Comision di Labor, Clifford Heyliger, Tromp-Lee ta pidi pa facilita e reunion cu minister. Entre e puntonan principal cu e kier pone riba mesa, tin reorganisacion di DAO y DPL, incluyendo e impacto riba funcionamento y servicio di ambos departamento.

Tambe e kier papia tocante situacion actual di personal na DAO y DPL, e desafionan cu empleadonan ta enfrenta y con esaki ta afecta servicio na publico.

Otro tema importante ta introduccion di salario minimo pa hoben, caminda e parlamentario kier haya informacion tocante e status actual y e siguiente pasonan pa implementacion.

Tromp-Lee ta pidi ademas un update tocante inspeccion y cumplimiento di legislacion laboral, incluyendo capacidad actual, accionnan cu ta tumando luga y medidanan necesario pa garantisa cu ley ta wordo cumpli.

Segun e parlamentario, un reunion directo cu Minister di Labor por yuda crea claridad, intercambia informacion y identifica solucionnan pa mehora tanto e situacion laboral como e servicio na ciudadano.