Keho di turista ta yega prensa internacional, pero ta e a yega laat pa su buelo

ORANJESTAD — E experiencia di un turista Mericano cu a perde su buelo saliendo for di Aruba a yega prensa internacional despues cu revista reconoci PEOPLE a publica su relato. Pero e circunstancianan ta mustra tambe cu e pasahera a yega na aeropuerto solamente 68 minuut prome cu salida di su buelo pa Merca, mientras Aruba Airport ta opera cu un bentana di tres ora pa pasaheronan cu ta biaha pa Merca.

Sienna Sage a conta cu dos accidente riba caminda pa aeropuerto a transforma un trayecto normal di aproximadamente 10 minuut den casi un ora y mei. El a sali rond 3:40 di atardi y finalmente a yega na aeropuerto pa 4:47, pa un vuelo programa pa 5:55 pa Newark.

Sage a bisa na PEOPLE cu e tabata “sorpendi” ora el a topa cu e  check-in counter cera y cu ya no tabatin posibilidad pa completa e proceso necesario pa subi avion.

E articulo internacional ta pone enfasis riba su sorpresa, pero e otro parti importante di e historia ta e regla y procedimentonan publica di Aruba Airport. Pa buelonan pa Merca, pasaheronan ta wordo maneha den un ventana di tres ora prome cu salida, entre otro debi na check-in, seguridad y e proceso di U.S. preclearance. Sage, consecuentemente, a yega hopi despues di e tempo cu aeropuerto ta indica pa e proceso aki.

E congestion causa pa e accidentenan tabata un circunstancia inespera, pero na momento cu Sage a sali pa aeropuerto, e tabata caba dentro di un margen mucho mas cortico cu e tres ora indica pa un vuelo pa Estados Unidos.

Despues di perde e buelo, United Airlines a acomoda Sage y su acompañante riba un siguiente buelo. Nan a pasa un anochi extra na Aruba, mientras Sage despues a transforma e experiencia den un advertencia publico pa otro biaheronan.

E caso a crea mas atencion internacional pa un experiencia negativo na Aruba, pero e cronologia ta pone e situacion den perspectiva: e pasahera a enfrenta trafico excepcional, pero mes momento no a sigui e margen di tempo cu Aruba Airport ta publica pa salida pa Estados Unidos.