Gobierno a contesta 404 pregunta riba presupuesto AIOF 2026-2027

ORANJESTAD — Gabinete AVP-FUTURO a entrega Parlamento su contestacion oficial riba 404 pregunta relaciona cu e prome presupuesto di Algemeen Investerings- en Ontwikkelingsfonds (AIOF) pa 2026 y 2027.

Segun Minister di Finansa Geoffrey Wever, e fondo ta destina pa inversionnan den infrastructura, enseñanza, renobacion di bario, facilidadnan publico, servicio di gobierno y desaroyo sostenibel.

AIOF a wordo crea oficialmente via ley dia 9 di juli 2026 y ta funciona como un instrumento financiero pa planifica y ehecuta inversionnan publico durante varios aña.

Gobierno a entrega e concepto di presupuesto na Parlamento dia 6 di augustus y a ricibi e preguntanan parlamentario dia 14 di september. Cu e contestacionnan entrega, e siguiente paso ta tratamento di e presupuesto den Parlamento.

Wever ta sostene cu AIOF mester contribui na mehoracion di calidad di bida, servicio publico y condicionnan pa desaroyo economico sostenibel di Aruba.