Jolinda Craane (UPB) ta sali inspira for di Congreso AVP pa sigui trabou politico na Boneiro

ORANJESTAD — Jolinda Craane, vice-lider di Union Patriotiko Boneriano (UPB) di Boneiro, a bishita Aruba riba invitacion di partido ruman AVP pa presencia Congreso 2026, caminda Wendrick Cicilia a wordo instala como lider nobo di partido. Den e ambiente politico di e congreso, Craane a bisa Noticiacla cu e experiencia a duna e oportunidad pa mira un dinamica politico diferente y gana ideanan pa su propio trabou na Boneiro.

Craane a indica cu politica na Aruba ta sinti mas grandi y mas intenso cu na Boneiro. “Na Boneiro nos ta un poco mas pacifico,” el a bisa, agregando cu p’e tabata “tremendo pa experiencia” e energia y ambiente durante e congreso.

E lider di UPB a splica cu e mes nunca a pasa door di un proceso completo di campaña electoral, y cu su presencia na Aruba ta dun’e oportunidad pa observa di cerca con un partido ta mobilisa su miembronan, simpatisantenan y liderato durante un momento importante di cambio.

“Ta un momento grandi pa experiencia aki y duna un idea tambe con nos por haci na Boneiro,” Craane a bisa.

E Congreso di AVP a marca e transferencia di liderazgo di Mike Eman pa Wendrick Cicilia, mientras cu UPB mes tambe ta pasando den un proceso di renovacion politico na Boneiro. Craane a indica cu e experiencia na Aruba por sirbi como inspiracion pa e proceso ey.

Segun e, e contacto cu otro politiconan y e energia di e congreso ta algo cu e ta hiba bek cu ne. “Mi ta bolbe cu mas energia pa sigui trece cosnan bon,” el a bisa.

Pa Craane, e bishita na Aruba no tabata solamente pa presencia un cambio di liderazgo den un partido ruman, sino tambe pa siña for di e experiencia y fortalece conexionnan politico entre AVP y UPB.  Keda pendiente pa e entrevista completo den e programa Noticiacla LIVE dentro di poco.