Bermudez (AVP) ta pidi claridad riba futuro di DPL y DAO y garantia pa personal

ORANJESTAD — Parlamentario di AVP Carlos Bermudez ta pidi Minister di Labor Wendrick Cicilia pa duna claridad tocante futuro di Departamento di Progreso Laboral (DPL) y Directie Arbeid en Onderzoek (DAO), despues di señalnan di preocupacion entre empleadonan tocante un posibel reorganisacion.

Bermudez kier sa si e Quick Scan ehecuta na ambos departamento a conclui, kico e principal conclusionnan y recomendacionnan ta, y si Gobierno ta dispuesto pa entrega e informe completo na Parlamento.

E parlamentario ta pidi informacion specifico tocante eventual cambionan den structura, division di tarea, gerencia y prestacion di servicio. Tambe e kier sa si tin plan pa integra of reorganisa DPL y DAO.

Segun Bermudez, cualquier cambio mester inclui claridad pa personal tocante nan funcion, posicion huridico y responsabilidadnan, ademas di consulta cu empleadonan y nan representantenan.