Turista ta bira di 12 morto den trafico pa 2026 na Aruba

ORANJESTAD — Un turista a perde bida y un chauffeur ta den estado critico despues di un accidente riba caminda di Sasaki, diamars madruga. Esaki ta e di 12 morto den trafico na Aruba pa 2026.

Polis a ricibi e aviso pa 1:38 di madruga. Segun e prome informacion, un Hyundai Accent shinishi a sali for di caminda. Patruya a topa dos homber gravemente herida den e auto; un di nan no tabata reacciona.

Apesar di asistencia medico, no por a salba e turista Dwann Kaleid Gatewood, naci na Merca. Un dokter forense a constata su morto. E chauffeur a wordo transporta cu maximo urgencia pa hospital.

Specialistanan di trafico y polis tecnico ta investiga e accidente. Slachtofferhulp a brinda sosten na famia, mientras Cuerpo Policial Aruba a expresa su condolencianan.