ABC: Aruba mester laga modelo turistico destructivo y move pa sostenibilidad

ORANJESTAD — Aruba Birdlife Conservation (ABC) ta sostene cu e modelo actual di desaroyo turistico di Aruba a yega na su limite y cu ta necesario pa Gobierno move pa un modelo mas amplio, realista y sostenibel.

Segun ABC, prome cu publicacion di reciente cifranan den e verspertino local Amigoe, e organisacion ya tabata ricibi hopi señal y informacion cu ta apunta den e mesun direccion. E reaccion di AHATA riba e politica nacional di transformacion turistico, segun ABC, ta reforsa e impresion cu e modelo di crecemento turistico usa durante hopi aña ya no ta adecuado.

E organisacion ta pidi Gobierno pa evita decisionnan basa solamente riba posicionnan popular y, en cambio, reuni un grupo amplio di expertonan pa analiza e situacion di forma integral.

ABC ta boga pa un modelo nobo cu ta tuma na cuenta bienestar di e poblacion, experiencia di bishitantenan y proteccion di naturalesa. Segun e organisacion, e enfoke mester ta holistico y sostenibel, cu un balansa entre economia, calidad di bida y medio ambiente.