Credito bancario y turismo subi, mientras entrada di Gobierno baha na augustus

ORANJESTAD — Economia di Aruba a registra mas actividad bancario y mas turismo na augustus 2026, mientras entrada total di Gobierno a baha compara cu un aña pasa.

Segun Banco Central di Aruba, cantidad di placa den circulacion a aumenta cu Afl. 123,7 miyon te na Afl. 7,64 biyon. E aumento a wordo impulsa principalmente pa mas credito bancario, particularmente na sector priva. Credito na empresanan a subi cu Afl. 82,1 miyon, hipotecanan cu Afl. 14,8 miyon y credito na consumidor cu Afl. 8,6 miyon.

Inflacion anual a yega 2,7% na augustus, cu transporte como e principal factor. Promedio anual di inflacion a subi di 0,7% na juli pa 1,0% na augustus.

Entrada total di Gobierno tabata Afl. 133,5 miyon, Afl. 33,9 miyon menos cu augustus 2025. Entrada di impuesto si a aumenta cu Afl. 17,2 miyon, pero esaki no tabata suficiente pa compensa e fuerte bahada den entrada no fiscal.

Turismo a sigui crece. Aruba a ricibi 145.750 turista na augustus, 9,8% mas cu un aña prome. Crecemento mas fuerte a bin for di Latino America, cu 47,8% mas bishitante, sigui pa Europa cu 16,6% y Norte America cu 1,6%.