MEP: Gobierno mester lidera cambio pa turismo mas sostenibel

ORANJESTAD — Fraccion di MEP ta pidi Gobierno pa tuma un rol mas activo den maneho di turismo, despues di un reunion parlamentario cu Aruba Tourism Authority (ATA) tocante crecemento di cantidad di bishitante, overtourism y transicion pa un modelo di “High Value, Low Impact”.

Segun MEP, ATA a expresa preocupacion tocante e aumento continuo di turista y ta boga pa stabilisa e volumen di bishitante. Sinembargo, no tur stakeholder den sector ta comparti e mesun vision y algun ainda ta enfoca riba mas crecemento.

Lider di fraccion Evelyn Wever-Croes ta argumenta cu, den e situacion aki, Gobierno mester determina un direccion cla pa busca un mihor balansa entre economia, calidad di bida, naturalesa y capacidad di Aruba.

MEP ta pidi tambe pa amplia e dialogo cu AHATA, ATSA, sector di aviacion y transporte maritimo, AAA y APA. Segun e partido, Parlamento mester traha hunto cu tur stakeholder pa determina unda limite di crecemento di turismo ta y cua medida ta necesario pa mantene Aruba atractivo tanto pa su habitantenan como pa bishitantenan.