AHATA ta rechaza plan turistico: menos bishitante, no mas impuesto y burocracia

ORANJESTAD — Aruba Hotel & Tourism Association (AHATA) no ta di acuerdo cu e Plan di Implementacion di Turismo 2026–2031. Despues di tres ronda di consulta cu Ministerio di Turismo, e asociacion ta bisa cu su recomendacionnan no ta suficientemente refleha den e documento. Asina AHATA ta bisa como prome reaccion riba e documento. 

AHATA ta boga pa stop e crecemento den cantidad di turista y enfoca riba bishitantenan cu ta contribui mas na economia y ta aprecia naturalesa y cultura. Tambe e kier controla e cantidad di crucero y avion cu ta yega riba mesun dia.

E asociacion ta rechaza aumentonan di impuesto y creacion di mas organo gubernamental. Segun AHATA, Gobierno mester priorisa gasto, mehora cobro y cumplimento di impuesto, y haci e structura existente mas efectivo.

Tambe AHATA ta cuestiona e propuesta pa sera beach y lama un dia pa luna, describiendo esaki como un medida simbolico. E ta sostene cu controla cantidad di bishitante lo reduci presion riba naturalesa mas efectivamente, y ta lamenta cu e plan no ta inclui su vision pa futuro di turismo.