Diario ABC: Hulanda a frustra Machado su regreso frustrante pa Venezuela

ORANJESTAD — E papel di Aruba como posibel escala pa María Corina Machado regresa Venezuela ta resalta den un reconstruccion di diario Spaño ABC. Segun e publicacion, e ruta via Aruba no a prospera pasobra e avion cu lo transporta e lider opositor no a haya permiso pa aterisa.

Periodistanan di ABC tabata acompaña Machado na Panamá, unda su ekipo a busca alternativanan despues cu un biahe pa lama a cancela pa un problema mecanico raporta cu e boto.

E prome vuelo planifica pa Aruba a topa cu obstaculonan administrativo relaciona cu su clasificacion como buelo priva of comercial. Su ekipo a busca un otro avion, pero segun e diario, despues a comunica cu e buelo no por a aterisa na Aruba.

Corsou y Boneiro tambe a wordo considera. ABC ta reporta cu Corsou tampoco a autorisa e aterisahe, mientras Boneiro a keda descarta durante e mesun intentonan.

E diario ta atribui e falta di autorisacion na autoridadnan hulandes, pero no ta identifica claramente cua instancia a tuma e decision pa cada isla. E relato tampoco ta inclui un splicacion oficial di autoridadnan di Aruba.

Segun ABC, Machado tabatin un paspoort diplomatico special entrega pa Panamá pa motibonan humanitario, sin cu esaki a otorga nacionalidad panameño. E publicacion ta conta shete intento sin exito pa regresa Venezuela, incluyendo e tres mas reciente pa lama y via e islanan ABC.