Tour Operators Uni: Awo nos tur por ta parti di e solucion tambe

ORANJESTAD - Despues cu representantenan di Tour Operators Uni y Gobierno di a Aruba a firma e asina yama ‘Protocolo di Maneho Responsabel den Naturalesa’ diaranson ultimo, e sector ta enfrenta 5 siman crucial pa yega na solucion nan practico y balansa. Pa prome biaha den 20 aña operadornan di tour ta haya oido y cu e protocol estableci, esaki ta habri espacio pa tur por forma parti di e conversacion aki.

Mientrastanto, cu permiso di Prome Minister Mike Eman, e operadornan di tour lo por cuminsa uza e ruta di California Lighthouse - Alto Vista bek mientras cu tur partido concerni ta continua cu dialogo na mesa. “Nos peticion pa awo na Gobierno ta pa mas pronto cu ta posibel delinea e ruta aki lagando un caminda di 6 meter hancho pa evita cu usuarionan sali for di e caminda y core unda cu ta”, asina representante nan di Tour Operators Uni a indica durante e firma di protocol. 

E acuerdo aki ta enfoca riba aspectonan di maneho responsabel den naturalesa, disposicion pa continua cu dialogo, exploracion conhunto pa solucion, tema nan manera ‘geofencing’, certificacion di guia, control, como tambe supervision y medida di sancion entre varios otro punto mas. Pa prome biaha den historia e operadornan di tour local a uni di e forma aki demostrando nan disposicion pa traha hunto y aporta positivamente na e protocol y dialogo.

Den e dianan nos dilanti Tour Operators Uni lo sigui colabora conhuntamente cu Gobierno y ta urgi tambe pa trece cambio of mas bien implementacion di articulo 13 y 14 den e ley di ROPV pa asina ancra e carreteranan existente aki cu nos conoce y ta uza desde añanan 80 den e ley. 

“Nos ta keda pendiente pa e fecha di e reunion den Parlamento, caminda cu Gobierno lo fija nan punto di bista y asina yuda nos garantisa e trankilidad di nos empleadonan como tambe mantene e sector stabil mientras cu nos ta sigui traha hunto den e proceso aki”, asina e repesentantenan di Tour Operators Uni a expresa. 

E caso di Aruba Birdlife Conservation contra Gobierno di Aruba y Aruba Conservation Foundation (Parke Arikok) a keda posponi pa dia 15 di October proximo, sinembargo Tour Operators Uni ta positivo cu durante e fase di dialogo por yega na un comprendemento comun pa loke ta proteccion y cuido di naturalesa, respetando nos comunidad local, e sector turistico y tur esunnan cu ta aporta na dje.