Gobierno y tour operators a firma protocol pa sigui dialogo riba UTV y ATV

ORANJESTAD — Gobierno di Aruba y varios tour operator activo den sector di UTV y ATV a firma un protocol  pa continua e dialogo tocante futuro di e actividadnan den area natural di Aruba oficialmente. E documento, fecha 9 di september 2026, ta busca pa crea espacio pa un solucion cu por combina proteccion di naturaleza cu interes economico y acceso responsabel na e area.

E protocol ta firma na nomber di Gobierno pa Prome Minister Mike Eman y Minister di Vivienda, Infrastructura, Servicio Interno y Telecomunicacion Rene Herdé. Representantenan di diferente tour operator, entre otro ABC Tours Aruba, Fofoti Tour & Transfer, De Palm Tours, Rockabeach Tours, AGW Tours y Aruba Ariba Tours, tambe a pone nan firma bao e documento.

Gobierno ta reconoce den e protocol cu e conflicto actual ta toca diferente interes: di un banda e preocupacionnan di tour operators y otro entrepreneur y usuarionan di e area, y di otro banda e necesidad pa protega naturaleza, paisahe y balor ecologico di Terra Cora.

E intencion ta pa sigui papia riba posibilidadnan concreto pa logra un balance entre conservacion di naturaleza y actividad economico. Entre e temanan cu por forma parti di e negociacion ta acceso limita y regula pa grupo chikito, determinacion di ruta fijo, eventualmente introduccion di un sistema di fee, zonificacion, supervision, control di boroto, handhaving y sancion. Tambe por wordo considera un plan di maneho pa naturaleza si e partidonan logra acuerdo.

Un punto importante ta cu e protocol no ta cambia ni perhudica e procedimiento hudicial cu ta andando actualmente. Gobierno ta indica explicitamente cu e resultado di corte ta keda independiente y cu cualkier resultado di e dialogo lo mester wordo evalua tambe den luz di e decision hudicial.

E documento ta referi tambe na e reunionnan cu a tuma lugar dia 4 y 7 di september, y ta confirma cu Gobierno ta dispuesto pa mantene e dialogo cu e sector y busca un solucion practico.

Na final, Gobierno ta pidi e partidonan envolvi pa normalisa e situacion actual pa e combersacionnan por sigui den calma. E protocol no ta un acuerdo final riba e futuro di UTV y ATV, pero ta pone por escrito e compromiso di ambos banda pa sigui negocia.