Hues ta duna Gobierno cinco siman pa busca solucion cu ABC y tour operators

ORANJESTAD — Corte di Prome Instancia a pospone e caso relaciona cu acceso y proteccion di costa noord pa cinco siman, cu e condicion expreso cu Gobierno di Aruba mester sinta na mesa cu Aruba Birdlife Conservation (ABC) y busca un solucion cu tambe tene cuenta cu interesnan di tour operators y comunidad Arubano. E caso ta programa pa sigui diaranson 15 di october 2026 pa 2:00 di atardi.

Den su decision di 9 di september, hues mr. A.H.M. van de Leur ta indica cu tin diferente interes cu mester wordo balancea. ABC ta defende proteccion di flora y fauna den areanan natural designa pa ley, mientras tour operators tin interes den continuidad di un forma di operacion cu pa añanan a wordo tolera. Gobierno, pa su parti, tin obligacion legal y di maneho pa proteha naturaleza, pero mester tene cuenta tambe cu interesnan di sector y interes general di Aruba.

Segun Corte, precisamente pa motibo di e diferente interesnan ey, no ta imprudente pa duna partidonan otro oportunidad pa yega na un solucion. Pero e posposicion tin un condicion importante: Gobierno mester determina ainda awe un fecha y ora dentro di e siman venidero pa sinta cu ABC, como partido demandante, y si ta necesario tene mas cu un reunion.

Meta di e reunionnan ta pa yega na un solucion cu ta “razonabel y trabahabel” pa partidonan, tour operators y interes general di Aruba. Corte ta bisa claramente cu tur parti mester contribui seriamente na e proceso, pasobra di otro forma oportunidad pa un solucion lo ta solamente ilusorio.

Hues a pone tambe presion riba Gobierno: si Corte considera cu Gobierno no a cumpli suficientemente cu e condicion pa busca dialogo cu ABC, e caso lo wordo trata hopi mas lihe, en principio sin posibilidad pa otro posposicion.

E decision ta crea awor un bentana di cinco siman pa Gobierno, ABC y sector busca un compromiso entre proteccion di naturaleza y continuidad di actividad economico na costa noord.