Eman: Gobierno a pidi pausa den caso UTV/ATV pa dialogo por continua

ORANJESTAD — Prome minister Mike Eman y minister Rene Herde diamars atardi a indica na un grupo di tour operator di UTV y ATV dilanti di Bestuurskantoor,  cu Gobierno a pidi Hues pa duna espacio pa pospone of pone pausa na e caso relaciona cu UTV y ATV, cu e meta pa por sigui dialogo cu tur e partidonan envolvi y busca un solucion balansa pa sector y naturaleza. E grupo a bin para dilanti di e edificio cu pancarta cu e intencion di haya sa di gobierno, si e caso entre gobierno y Aruba Bird life Conservation, ta para of no. 

Segun Herdé, durante e reunion di diasabra cu representantenan di sector UTV/ATV, Gobierno a ricibi un splicacion amplio tocante nan preocupacionnan y posicion. Minister a bisa cu Gobierno a scucha cu atencion y ta considera e dialogo importante pa por yega na un arreglo cu por tene cuenta cu tur interes envolvi.

BUSCANDO PA CREA ESPACIO

E intencion, segun e minister, ta pa crea espacio pa e conversacionnan continua mientras Gobierno, sector y otro partidonan busca un solucion cu permiti cu negoshinan por sigui opera y empleonan por wordo conserva, sin laga proteccion di naturaleza un banda.

Herdé a enfatisa cu e solucion mester ta uno balansa. “Nos mester garantisa naturaleza, pero tambe garantisa e sector di tour y otro forma di recreacion,” ta e esencia di e posicion expresa pa minister.

GOBIERNO A SOLICITA UN APLAZAMENTO

E caso tabata programa pa dia 10 di september, pero Gobierno a solicita un aplazamento. Na momento di e declaracion, ainda no tabatin claridad definitivo si Hues lo acepta e peticion of si tratamento di e caso lo sigui manera planea. Eman a sigura tur hende cu nan lo informa asina cu nan haya e decision final di corte. Esnnan cu tabata protesta, a sigura cu nan kier un contesta mas tarda diaranson dia 9 di September, esta prome cu e fecha di e caso cu ta dia 10 di September awor pa 10’or di mainta. 

TENSION 

E paso di Gobierno ta sigui riba varios dia di tension rond futuro di UTV y ATV na Aruba, mientras e sector ta pidi siguransa tocante ruta, continuidad di actividad y empleo, y organisacionnan ambiental ta sigui insisti riba proteccion di areanan natural.

Pa Eman y Herde, e meta ta pa no laga e conflicto termina solamente den Corte, sino pa usa e espacio disponibel pa yega na un acuerdo cu por duna continuidad economico y proteccion ambiental na mes momento.