OM: A parti multa pa negoshinan y hende pa traficacion y trabou ilegal

ORANJESTAD — Ministerio Publico (OM) a impone durante ultimo lunanan varios transaccion di te Afl. 15.000 den casonan relaciona cu traficacion di hende y trabou ilegal. Asina e la informa diamars mainta. 

E transaccionnan a wordo impone tanto na companianan como na personanan individual. Segun OM, e sospechonan tabata inclui yuda personanan drenta Aruba ilegalmente, ofrece estadia na hende cu tabata kedando ilegalmente na isla y pone personanan traha sin cu nan tabata legalmente na Aruba.

E hechonan ta castigabel bou di articulonan 2:154 y 2:155 di Codigo Penal di Aruba. OM ta indica cu e ta persigui e delitonan aki pasobra nan ta pone presion riba e maneho di Gobierno pa combati estadia y trabou ilegal y por crea un circuito ilegal cu consecuencia negativo pa comunidad.

Segun Ministerio Publico, no solamente personanan stranhero por wordo perhudica, sino tambe e comunidad local. P’esey OM ta haci un yamada principalmente na dunadornan di trabou y huurdonan pa informa nan mes bon tocante ley y reglamento prome cu nan yuda un persona bin Aruba, huur un luga pa keda of tuma un persona na trabou.

OM ta adverti cu, aunke cierto caso por wordo resolvi via un Cita cu Fiscal y un transaccion, otro caso por termina dilanti Hues.