BCA: Aruba ta mira mas turismo y entrada di Gobierno, mientras placa den circulacion ta baha

ORANJESTAD — Den juli 2026, Aruba a registra crecemento den turismo y entrada di Gobierno, mientras e cantidad di placa den circulacion a baha y inflacion a subi modestamente.

E cantidad di placa den circulacion a baha cu Afl. 201,9 miyon compara cu juni, yega na Afl. 7.520,9 miyon. E cambio a wordo causa principalmente pa un bahada den reserva di divisa netto, parcialmente compensa pa un subida den activo domestico netto.

Credito bancario na sector priva a aumenta, principalmente pa mas credito na empresa, hipoteca pa vivienda y credito na consumidor. Na mes momento, deposito di Gobierno a subi, loke a contribui na menos credito bancario netto na sector publico.

Inflacion anual tabata 2,2% na juli 2026, cu transporte como e principal contribuyente na e aumento di prijs. E promedio anual di inflacion a yega na 0,7%.

Entrada total di Gobierno a suma Afl. 139,5 miyon, Afl. 5,5 miyon mas cu juli 2025. E aumento a bin principalmente for di mas entrada di impuesto, incluyendo transfer tax, turnover tax y impuesto riba propiedad.

Turismo a registra un crecimiento fuerte. Aruba a ricibi 160.858 turista, 18.954 mas cu juli 2025, un aumento di 13,4%. Mercado Latino Americano a crece cu 44,1%, Norte Americano cu 7,2% y Europeo cu 7,9%.