CAft: Aruba tin surplus fuerte, pero inversion ta keda demasiado abou

ORANJESTAD — Aruba ta proyecta un surplus fuerte pa 2027 y un reduccion continuo di deuda publico, pero segun CAft, Gobierno ta inverti demasiado poco compara cu e necesidadnan grandi den infrastructura y desaroyo.

Pa 2027, sector colectivo ta proyecta un surplus di Afl. 203 miyon, equivalente na 2,3% di PIB. Deuda colectivo lo por baha di alrededor di Afl. 4,568 mil miyon, 53% di PIB na fin di 2027, pa aproximadamente 39% na 2031.

Sinembargo, CAft ta considera e Afl. 3,5 miyon cu ta presupuestá directamente pa inversion como “marginal”. Gobierno kier canalisa mayoria di inversion futuro via e Fondo General di Inversion y Desaroyo, AIOF, cu tin Afl. 11 miyon reserva pa 2027. Pero e fondo ainda no ta operacional y no tin un plan multi-annual cla cu ta indica ki proyectonan lo haya financiamiento.

CAft ta pidi Ministro di Finansa Geoffrey Wever pa presenta presupuesto di AIOF y un plan di inversion multi-annual prome cu Presupuesto 2027 wordo presenta na Parlamento.

Otro preocupacion ta e carga di interes: na 2027, aproximadamente 15 cent di cada florin cu Gobierno recauda lo bay na pago di interes. CAft tambe ta adverti cu envejecemento di poblacion lo pone mas presion riba AZV y SVb den futuro.

Segun CAft, e perspectiva financiero di Aruba ta positivo, pero surplus y reduccion di deuda mester wordo acompaña pa inversion planifica cu por fortalece infrastructura y capacidad economico di pais.