Vroegop: HOH no por sigui duna mas, cu cada biaha menos placa

ORANJESTAD — Situacion financiero di Dr. Horacio E. Oduber Hospital (HOH) ta sigui causa preocupacion. Director di hospital, Jacco Vroegop, a confirma na Noticiacla den fin di siman cu hospital ya pa hopi tempo no ta ricibi suficiente fondo pa cubri e gastonan necesario pa mantene cuido medico na e nivel cu comunidad ta exigi. “Nos no ta haya suficiente placa pa por draai hospital,” Vroegop a declara. Segun e director, mientras costo di bida y costo operacional a subi considerablemente den ultimo añanan, e compensacion cu hospital ta ricibi via AZV ta aumenta solamente cu aproximadamente 2% pa aña. “Shen euro na 2020 tabatin otro balor cu shen euro na 2026. E mesun cos ta conta pa hospital. AZV ta duna 2% aumento pa aña, pero esey no ta suficiente,” el a bisa.

Vroegop a menciona cu costo di material medico a subi fuerte. Como ehempel, el a indica entre otro cu handschoen medico ta costa entre 15 y 16% mas, mientras cu cierto medicamento a bira hasta 30% mas caro.

“Tur cos mester bin cu avion of barco. E prijsnan a subi di forma espantoso,” segun e director.

Banda di aumento di costo, hospital tambe ta enfrenta un aumento den cantidad di persona cu mester ricibi cuido. Vroegop a indica cu miles di persona a wordo legalisa den ultimo dos aña, mientras e presupuesto no a crece proporcionalmente cu e aumento den demanda. “Tin mas hende cu ta bin acerca, pero pa e mesun placa nos mester atende hopi mas hende. Esey naturalmente no por sigui asina,” el a declara.

Segun Vroegop, e consecuencia ya ta visibel. Hospital no por ehecuta tur cos manera mester y temponan di espera pa acceso na cierto cuido ta aumentando.

“Nos ta mira awor cu tin cos cu simplemente nos no por haci, y e temponan di espera ta bira mas largo. Finalmente esey naturalmente no ta bon,” el a splica.

Un otro punto cu, segun Vroegop, ta pone presion serio riba finansa di hospital ta cuido pa persona indocumenta. Director di HOH a indica cu actualmente tin alrededor di Afl. 28 miyon pendiente pa cuido entrega na hende indocumenta, monto cu segun dje ainda no a wordo paga pa Gobierno.

“Apesar di tur loke Dowers ta bisa den media, nos como hospital ainda no ta mira ni un florin bin den nos direccion,” Vroegop a declara.

E director a enfatisa cu hospital no lo nenga cuido na persona cu realmente tin necesidad medico.

“Naturalmente nos ta duna cuido na hende cu tin mester di dje. Esey ta cuadra cu nos vision y ta forma parti di e huramento di e mediconan,” el a splica.

Pero segun Vroegop, e consecuencia financiero no por wordo ignora. Ora hospital mester carga e gastonan sin haya compensacion, esaki ta afecta otro prioridadnan.

“E ta bay tambe na costo di inversion y capacidad di cuido pa e poblacion cu ta asegura via AZV,” el a adverti.

E director a confirma cu desde februari hospital ta den dialogo cu diferente stakeholder riba e problema financiero general. Segun e, un paso positivo a wordo alcanza e siman aki, despues cu a acorda pa haci un investigacion pa verifica e aumento real di costonan cu hospital ta confrontando.

Vroegop ta considera frustrante cu, apesar di e dialogonan cu ta dura lunanan, un solucion concreto ta tarda.

“Nos ta papia hopi, pero demasiado poco ta pasa realmente,” el a declara.

El a pone enfasis tambe riba disponibilidad di fondo den sistema di salud. Segun Vroegop, mientras cu AZV ta presenta resultado financiero positivo cu surplus, hospital ta sigui lucha cu fondo insuficiente pa cubri cuido cu mester wordo entrega awe.

“Nan ta papia semper di despues y di futuro, pero esaki ta trata di awe! Mester tin suficiente fondo disponible pa e cuido cu ta wordo pidi y cu nos mester entrega,” el a bisa.

Vroegop a expresa speranza cu e dialogo actual finalmente lo conduci na un solucion, pero a laga cla cu situacion no por sigui indefini.

E advertencia di director di HOH ta pone enfoke riba un problema central: mientras demanda di cuido ta crece y costonan ta subi, hospital ta wordo obliga pa trata di haci mas cu fondo cu, segun direccion, ya no ta suficiente pa mantene e nivel di cuido cu Aruba tin mester di dje.

Awor tin tambe e carga adicional di Afl. 28 miyon na cuido pa persona indocumenta cu, segun HOH, ainda no a wordo compensa, mientras e mesun hospital mester sigui inverti den personal, medicamento, material y capacidad pa atende e poblacion asegura via AZV.

Pa Vroegop, e discusion ya no ta solamente riba presupuesto futuro, sino riba capacidad di hospital pa entrega awe e cuido cu comunidad ta spera di dje.