Vroegop: Hulanda a menaza Aruba cu stop di sosten financiero durante corona

ORANJESTAD — Director di Horacio Oduber Hospital, Jacco Vroegop, a declara cu durante pandemia di COVID-19 Aruba a wordo pone bou di presion pa sigui e medidanan di corona di Hulanda. Segun e, e staatssecretaris di Salud Publico hulandes di e tempo ey, Paul Blokhuis, a laga sa cu ‘si Aruba no subi e grado di vacunacion, sosten financiero lo por a wordo para’. E declaracion a aparece den un articulo publica pa e corant/revista Hulandes De Andere Krant.

Vroegop a conta cu e advertencia a wordo haci durante un reunion online den december 2021 entre Hulanda y representantenan di e islanan Caribeño. Segun su relato, e mensahe tabata cla: si e islanan no logra subi e porcentahe di vacunacion, nan lo no haya mas sosten financiero.

E director di hospital a critica e manera cu e presion a wordo aplica, specialmente na un momento cu Aruba tabata pasando den un crisis economico severo pa motibo di pandemia. Turismo tabata praticamente para, y hopi habitante tabata dependiente di asistencia y banco di cuminda.

“Menasa cu stop subsidio mientras mitar di e isla ya tabata na e banco di cuminda pa motibo cu turista no tabata bin,” ta manera Vroegop a caracteriza e situacion den e entrevista.

Vroegop, kende durante pandemia tambe tabata presidente di Outbreak Management Team na Aruba, a declara cu e tabata critico riba varios aspecto di e politica di corona, entre otro obligacion di vacunacion y otro restriccionnan. Segun e, e relacion entre e paisnan tabata uno desigual durante e crisis. “Hulanda realmente a chantagea,” e a bisa.

De Andere Krant a busca reaccion di Paul Blokhuis riba e acusacionnan y riba e relato di e reunion, pero segun e corant, e ex-staatssecretaris no a responde. E medio tambe a contacta e organisacion unda Blokhuis ta traha actualmente, pero no a haya un declaracion di fondo.

Den e mes articulo, tambe ta haci referencia na investigacionnan den Hulanda riba e uso di telefon den periodo di pandemia, despues cu a sali na cla cu servicio di inteligencia AIVD y MIVD a intercepta comunicacion di algun persona cu tabata critico riba e politica di corona.

E declaracion di Vroegop ta pone un luz nobo riba e manera cu Aruba y otro parti di Reino Hulandes a experimenta e presion politico y financiero durante pandemia. E afirmacion central — cu sosten financiero tabata relaciona cu e grado di vacunacion — ta uno serio, pero te awor e ex-staatssecretaris Blokhuis no a duna un reaccion publico riba e acusacion. Por lesa e articulo original AKI.