Di dos anochi di CNSJ tabatin Aruba, salsa y leyendanan musical

WILLEMSTAD — Diabierna anochi, 4 di september, Curaçao North Sea Jazz Festival a sigui cu su di dos anochi cu un line-up fuerte y varia, reuni jazz, salsa, pop, soul, rock y dancehall riba tres escenario. E programa a conta cu Jeon, Monty Alexander Jamericana, Rubén Blades cu Roberto Delgado Big Band, PJ Morton, The Jacksons, Toto y, despues di mei anochi, Sean Paul.

Jeon, naci y cria na Aruba, a representa Caribe cu su mezcla di ritmo latino, pop y influencia internacional. E artista Arubiano a logra fama mundial cu Machika, hunto cu J Balvin y Anitta, mientras su hit Bluewave a bira un himno relaciona cu e clasificacion historico di Curaçao pa Mundial di Futbol 2026.

Jazz a haya un figura di peso den Monty Alexander, pianista Jamaicano cu mas di 75 grabacion y un estilo cu combina jazz Americano cu reggae, calypso, gospel y blues. Na otro banda, Rubén Blades, conoci como “e poeta di salsa”, a trece su Fotografías Tour hunto cu Roberto Delgado Big Band, combinando salsa cu letra social y influencia di jazz.

PJ Morton a aporta soul, gospel y R&B, mientras e unico miembro di e grupo The Jacksons, Marlon Jackson a pone publico den ambiente nostalgico cu clasiconan di un di e famianan musical mas famoso den historia. Lamentablemente Celia a keda chikito, unda cu por lo menos 1000 persona a keda pafo sin por a drenta, causando poco disgusto. Otronan a Sali, pasobra nan ta bisa cu a priminti nan un grupo, siendo cu ta solamente 1 miembro di The Jacksons a aparece. Asina mes, esnan cu si tabatey, a goza di e leyenda musical.  Despues a sigui, Toto cu a representa rock internacional cu hitnan mundial manera Africa, Rosanna y Hold The Line.

E anochi a sigui te despues di mei anochi, ora Sean Paul a subi escenario Sir Duke pa sera e programa cu su dancehall y hitnan internacional manera Get Busy, Temperature y We Be Burnin’. Su show tabata programa di 12:15 te 1:30 di mainta.