Refineria di Aruba ta prepara demolicion di dos chimenea di 300 pia

ORANJESTAD — Refineria di Aruba (RDA) a inicia un proceso internacional pa selecciona un contratista pa demolicion di dos chimenea di beton di aproximadamente 300 pia halto. E trabou ta forma parti di un proyecto relaciona cu seguridad energetico di Aruba.

E proyecto lo inclui un inspeccion tecnico di e sitio, preparacion di zonanan di seguridad, seleccion di e metodo adecuado pa demolicion, desmantelamento controla, maneho di materialnan di desecho y limpieza final di e area. RDA ta indica cu participacion di forza laboral local ta fuertemente recomenda.

Debi na e complehidad tecnico di e trabou, seguridad y cumplimiento cu reglanan lo forma parti central di e proceso. Companianan interesa mester pasa un proceso di preseleccion y presenta documentacion relaciona cu salud, seguridad y medio ambiente.

E convocatoria internacional ta marca un siguiente paso den preparacion di e sitio pa futuro actividadnan relaciona cu infrastructura energetico. E comunicado no ta indica ainda cua metodo specifico di demolicion lo wordo usa ni na cua fecha e trabounan fisico lo cuminsa.

E periodo pa companianan cualifica registra nan interes ta habri te 2 di october 2026. NOTA. E potret ta genera pa IA.