32 sospechoso procesa como grupo pa asesinato di guardia di seguridad na Hulanda

OVERASSELT — Ministerio Publico di Oost-Nederland ta considera 32 persona deteni despues di e violencia na Overasselt como un grupo sospechoso di asesinato of homicidio di un guardia di seguridad.

E grupo ta consisti di 16 Frances, 11 Hulandes, 2 Algeriano, 1 Libio, 1 Ucraniano y 1 Belga. Dos di e sospechosonan Frances ta menor di edad, di 16 y 17 aña. E otro sospechosonan tin entre 18 y 32 aña.

E guardia a wordo tira morto den anochi di dialuna pa diamars mientras e tabata vigila cas di Jan G., un homber cu ta wordo asocia cu criminalidad di droga y cu anteriormente a wordo condena pa esaki.

E 32 sospechosonan ta wordo investiga tambe pa intento di asesinato di dos agente di polis, preparacion pa asesinato, homicidio, secuestro, privacion di libertad y posesion di arma di candela.

Tur 32 lo comparece dilanti huez comisario, kende lo dicidi si nan lo keda mas largo deteni. Investigacion ainda mester determina ken exactamente a tira y cua rol cada sospechoso tabatin.

Polis a detene 34 persona en total. Dos lo wordo libera pa falta di suficiente conexion directo cu e lugarnan di delito, pero nan ta keda sospechoso den e caso.