Aruba Lions Club ta fortalece amistad internacional cu bishita di St. Lawrence Lions Club

ORANJESTAD — Aruba Lions Club a ricibi un delegacion di St. Lawrence Lions Club di Massachusetts, Merca, durante un encuentro oficial na Lion’s Den. Durante e actividad, ambos club a intercambia regalo y a comparti momentonan di camaraderia, fortaleciendo nan lazonan di amistad y cooperacion internacional.

E delegacion bishitante a expresa hopi agradecimento pa e hospitalidad recibi na Aruba y a indica cu, apesar di a bishita varios isla den Caribe, e recibimento na Aruba tabata particularmente caluroso. Nan a invita Aruba Lions Club pa haci un bishita na Boston den futuro.

Despues di e encuentro, e delegacion a bolbe na puerto pa aborda Carnival Horizon. Aruba Lions Club a reafirma su compromiso cu servicio, amistad y cooperacion cu clubnan Lions rond mundo.