Aruba por haya mas acceso na fondo Europeo bou plataforma nobo di Reino

ORANJESTAD /DEN HAAG  — Hulanda ta trahando riba un plataforma Europeo comun pa Aruba y e otro islanan Caribeño den Reino, cu meta di fortalece cooperacion cu Bruselas y facilita acceso na subsidio y inversion di Union Europeo.

Pa Aruba, esaki por significa mas sosten pa prepara proyecto y haci uso efectivo di fondonan Europeo cu actualmente no semper ta wordo aprovecha completamente. Un di e problemanan ta cu islanan cu status LGO tin acceso formal na diferente programa, pero capacidad pa prepara y ehecuta proyecto ta limita.

Hulanda kier cu Aruba y e otro islanan haya acceso na mas fondo bou e futuro programa Global Europe, y no solamente na e parti mundial cu representa alrededor di 6% di e presupuesto disponible.

Den negociacionnan pa presupuesto Europeo 2028-2034, Hulanda ta boga tambe pa procedimiento mas simpel, presupuesto territorial separa pa cada isla y convocatorianan adapta pa jurisdiccion chikito.

Prioridadnan di inversion ta inclui conexion digital y maritimo, transicion energetico y, recientemente, tambe maneho di desperdicio. Aruba y e otro islanan a wordo invita pa presenta proyectonan concreto.