Minister Wever ta honra piscadonan y reafirma sosten pa sector

ORANJESTAD – Minister di Finansa, Asunto Economico y Sector Primario, Geoffrey Wever, a honra piscadonan Arubiano durante celebracion di Dia Internacional di Piscado, na ocasion di e torneo di pesca di Hadicurari, unda 42 boto a participa.

Wever a destaca cu pesca ta forma parti importante di tradicion, identidad y economia local di Aruba. Segun e minister, e reto ta pa modernisa y fortalece e sector den un manera sostenibel, mientras conocimiento di generacionnan anterior ta wordo conserva.

Gobierno ta traha tambe riba modernisacion di Santa Rosa y fortalecemento di servicionan pa Sector Primario. Wever a menciona e programa Piskechi, cu ta siña muchanan con pa pisca y brinda nan conocimiento tocante diferente aspecto di pesca.

Minister a enfatisa cu Aruba mester crea condicionnan pa un generacion nobo por mira un futuro den pesca, como parti di un Sector Primario mas fuerte, productivo y sostenibel.