Croes: Aruba merece un monumento prominente pa honra su herencia Caquetio

ORANJESTAD - Ciudadano Helena Croes ta pone enfasis riba e importancia di Aruba su herencia indigena y ta argumenta cu a yega ora pa e isla honra e pueblo Caquetio cu un monumento prominente den espacio publico.

Croes ta referi na diferente cronista y autor historico cu a describi e Caquetionan como hende di bon apariencia, tanto homber como muher, y den algun relato hasta como hende di statura excepcional. Segun e, e descripcionnan historico ta mustra un contraste notable entre e manera cu e Caquetionan di Aruba tabata wordo describi y e manera cu algun autor tabata papia di otro pueblonan indigena di region.

Entre e fuentenan cu Croes ta menciona tin Dominee Bosch, kende a compara e Caquetionan Arubiano cu e Guajironan, y Galeotto Cei, un comerciante Florentino di siglo 16, kende a skirbi cu admiracion tocante e Caquetionan cu el a conoce na tera firme.

Croes tambe ta cita Juan de Castellanos, kende den Elegias de varones ilustres de Indias a describi e habitantenan indigena di Aruba y Corsou como hende elegante, fuerte y di bon proporcion, y a referi na e islanan como “islas de gigantes”. Castellanos tambe a identifica nan idioma como Caquetio.

Pa Croes, ta sorprendente cu apesar di e herencia aki, Aruba tin tiki representacion publico visible di su identidad indigena. E ta destaca cu Banco Central di Aruba ta un di e poco lugarnan cu a duna espacio na un statua di un Caquetio.

Su pregunta central ta: kico a pasa cu nos identidad indigena den e proceso di desaroyo di Aruba?

Croes ta considera cu a yega ora pa Gobierno instala un monumento prominente di un Caquetio na un lugar visible y significativo, manera Spaans Lagoen, Santa Cruz, Savaneta, Noord of Pos Chiquito, como reconocemento di e raiz indigena di Aruba.