131 a registra 10.481 contacto den 2025; informacion, violencia entre motibonan principal

ORANJESTAD – Servicio 131 a registra 10.481 contacto durante 2025 via telefon, chat, email, website, lectura, workshop y proyecto. E servicio, cu ta opera anonimo y confidencial, ta dirigi principalmente na mucha y hoben di 8 pa 24 aña na Aruba, y tambe ta accesibel pa hobenan na Boneiru, St. Eustatius y Saba.

E motibo mas frecuente pa contacta 131 tabata buskeda di informacion, cu 6.380 contacto. Esaki a wordo sigui pa violencia cu 1.034, situacion na cas cu 995, salud mental cu 864 y droga cu 484 contacto.

Di tur e contactonan, 4.483 tabata di homber, 4.630 di muher y den 1.368 caso sexo no a wordo identifica. Juni tabata e luna cu mas actividad, cu 2.786 contacto, sigui pa september cu 2.369.

Durante 2025, 131 a sigui inverti den entrenamiento di su team di mentor, incluyendo formacion riba salud mental, sensibilidad emocional y violencia. E organisacion tambe a amplia su actividadnan preventivo den scol y comunidad, entre otro cu e workshop “Ken mi ta?”, e proyecto “Best Dad Ever” y actividadnan hunto cu UNICEF Nederland relaciona cu derecho y bienestar di mucha.

131, funda na 1999, ta funciona no solamente como linea di sosten, sino tambe como centro di conocemento riba cuido y desaroyo di mucha y hoben. E organisacion ta traha cu alrededor di 45 partner den Aruba y otro isla pa mantene continuidad y calidad di su servicionan.